रामेछाप । रामेछापमा कार दुर्घटना हुँदा ३ जना घाईते भएका छन् । जिल्लाको खाँडादेवी गाउँपालिका–१ माझिटोलस्थित मध्य पहाडी लोकमार्गको भित्री सडक खण्डमा आज अपरान्ह कार दुर्घटना हुँदा एक बालकसहित ३ जना घाईते भएका छन ।

नेपालथोकबाट लुभुघाटतर्फ जाँदै गरेको बा १८ च ६८५३ नम्बरको सुजुकी कार अनियन्त्रित भई सडकबाट करिव ४० मिटर तल खस्दा काभ्रेको पनौती नगरपालिका– ५ का कार चालक ३२ वर्षीय बिनोद श्रेष्ठ, सोही स्थानका ३४ वर्षीय कुमार तामाङ र उनका छोरा अन्दाजी ३ वर्षीय सलिन तामाङ घाईते भएको रामेछाप प्रहरीले जनाएको छ ।

कार चालक श्रेष्ठको अवस्था मध्यम रहेको र बाँकी सवार २ जनाको अवस्था सामान्य रहेको जिल्ला प्रहरी कार्यालय रामेछापले जनाएको छ । उनीहरुलाई उपचारका लागि धुलिखेल अस्पताल काभ्रे पठाइएको छ ।