काठमाडौ । दोलखामा ट्रकको ठक्करबाट एक बृद्धको मृत्यु भएको छ । ट्रकको ठक्करबाट मृत्यु हुनेमा कालिञ्चोक गाउँपालिका वडा नम्बर ७ सित्काका ६९ वर्षिय गंगा बहादुर पाण्डेको मृत्यु भएको हो ।

सिन्धुलीबाट आज दिउँसो रड र सिमेन्ट लिएर दोलखाको सिंगटीतर्फ जाँदै गरेको ६९१३ नम्बरको ट्रकको ठक्करबाट पाण्डे गम्भिर घाईते भएका थिए । गम्भिर घाईते भएका पाण्डेलाई उपचारका लागि चरिकोटस्थित च्छोरोल्पा अस्पतालमा ल्याए लगत्तै चिकित्सकले मृत घोषणा गरेको कालिञ्चोक गाउँपालिका वडा नम्बर ७ का वडाध्यक्ष रामबहादुर पाण्डेले जानकारी दिनुभयो ।

वडा अध्यक्ष पाण्डेले दिएको जानकारी अनुसार सडकको छेउमा हिँडिरहेका पाण्डेलाई ट्रकले ठक्कर दिएको थियो । घटना लगत्तै ट्रक चालकलाई प्रहरीले नियन्त्रणमा लिएको छ । घटनाको विषयमा थप अनुसन्धान भइरहेको दोलखाका प्रहरी प्रवक्ता, प्रहरी निरिक्षक राजेश सिग्देलले जानकारी दिनुभयो ।