काठमाडौं । पाल्पामा गएराति भएको बस दुर्घटना हुँदा ६ जनाको मृत्यु भएको छ । पाल्पाको नादेवि छहरा गाउँपालिका वडा नं ८ खुर्सानेमा भएको सवारी दुर्घटनमा अन्य १८ जना घाइते भएका छन् । मृत्यु हुने ६ जना नै महिला रहेका छन् ।

रुपन्देहीको सालझण्डीबाट यात्रु लिएर गएको १ ख ४९७७ नम्बरको बस यात्रुबहाक बस खुसार्ने पुग्नै लाग्दा राति साढे ९ बजे मधुवन टारीफाँट नजिकै राधादी गैरामा दुर्घटना भएको प्रहरीले जनाएको छ । मृत्यु हुने सबै खुर्साने गाउँका छन् ।

प्रहरीका अनुसार दर्घटनामा खुसार्ने गाउँका खेमकुमारी राना, निर्मला घिमिरे, सुरुमा घिमिरे, कमला खत्री, दानकुमारी खत्री र गुनी गाहाको मृत्यु भएको छ । मृतकमध्ये तीन जनाको शव बाहिर निकालिएको छ भने ३ जना बसले च्यापेको अवस्थामा छन् । बस सडकबाट करिब ६० मिटर तल भिरमा खसेको छ ।

पाल्पा र रुपन्देहीका प्रहरी तथा स्थानीयले उद्धारको कार्य जारी राखेको स्थनीय प्रहरी चौकी जुठापौवाले  जनाएको छ । दुर्घटनामा घाइते भएका अन्य १८ जनालाई लुम्बिनी प्रादेशिक अस्पताल बुटवल पठाइएको प्रहरीले बताएको छ । घटनास्थल रुपन्देहीको सालझण्डीदेखि करिब १० किलोमिटरको दुरीमा पर्दछ ।