काठमाडौ । दोलखा एमालेमा विवाद सुरु भएको छ । अन्तर्घातका  कारण चुनाव हारेको भन्दै विवाद सुरु भएको हाे । विवाद बढ्न थालेपछि एमालेको दोलखा जिल्ला कमिटीले बैठकसमेत बोलाइसकेको छ ।

चुनावको अन्तिम नतिजा निस्केलगत्तै जिल्ला कमिटीले २९ मंसिरका लागि चुनावी समीक्षा बैठक बोलाएको हो । दोलखामा एमाले नेता बालकृष्ण शिवाकोटी माअ‍ोवादी केन्द्रका उम्मेदवार गंगा कार्कीसँग ३ सय १८ मतले पराजित भएका छन् ।

शिवाकोटीको पराजयमा एमाले नेताहरूको घरझगडालाई कारक मानिएको छ । एमाले नेताहरू पार्वत गुरुङ र आनन्द पोखरेलबीच लामो समयदेखि विवाद छ । अहिलेको चुनावमा पोखरेल र गुरुङले टिकटको दाबी गरेका थिए ।

टिकटको दाबी गर्दा अन्तिम समयमा पोखरेलले टिकट पाउने निश्चित भएको थियो । तर, गुरुङले अवरोध गरेपछि शिवाकोटीले टिकट पाएका हुन् । त्यसपछि पोखरेलले असहयोग गरेकाे लागेको आरोप छ ।

पोखरेलकै वडामा सबैभन्दा कम एमालेलाई मत आएपछि विवाद झन् बढेको छ । चर्काे अन्तर्घात भएकै कारण चुनावी  नतिजा आएकै दिन बैठकका लागि सूचना जारी गरिएको हो ।